ढगाच्या कविता

प्रवासी ढगाचे
कुणी गीत गावे
तुटे थेंब त्याला
नदी जीव लावे

ढगाचे पिसारे
रिता मोर नाचे
शब्दात भिजले
कुणी अर्थ वाचे

ढगाचे अडकणे
चालणे न् थबकणे
असण्यात नसणे न्
दिसण्यात असणे

रुजणे ढगाचे
धुक्याच्या उश्याशी     
खुणा शोधताना
उसवणे स्वतःशी     


॥ सयामी॥


प्रवासी ढगाचे
कुठे गाव आहे
पहाडात हाका
उगा येत आहे

खुळ्या चांदण्याचे
कुसुंबी उखाणे
ढगाचा अबोला
निळेशार गाणे

ढगाच्या नीजेशी
स्वप्न माझेच आहे
नदीच्या तळाशी
तुझे नाव आहे